Pse nuk ftoh mirë kondicioneri?

Një kondicioner që punon gjithë ditën dhe dhoma mbetet e ngrohtë ka gjithmonë një shkak. Disa i kontrolloni vetë në pak minuta, të tjerët kërkojnë matje.

Kontrollet e para

• Modaliteti dhe temperatura. Sigurohuni që aparati është në ftohje (ikona e borës) dhe jo në ventilim ose "auto".
• Filtrat. Filtrat e zënë nga pluhuri e ulin shumë sasinë e ajrit. Pastrojini dhe provoni sërish.
• Dyert dhe dritaret. Një derë e hapur drejt një ambienti tjetër e shumëfishon ngarkesën.

Shkaqet që kërkojnë ustain

• Mungesë gazi. Gazi nuk harxhohet: nëse mungon, ka rrjedhje. Shenjat janë ajri jo mjaft i ftohtë dhe akulli në tubat e njësisë së jashtme.
• Njësia e jashtme e ndotur ose pa ajrim. Kondensatori i mbuluar me pluhur ose gjethe, ose i vendosur në një kënd pa qarkullim ajri, nuk e nxjerr dot nxehtësinë.
• Ventilator ose kondensator elektrik me defekt. Aparati mund të ndizet, por kompresori ose ventilatori nuk punojnë si duhet.
• Fuqi e vogël për ambientin. Një aparat 9000 BTU në një sallë me shumë diell nuk e arrin dot temperaturën, sado mirë të punojë. Provoni kalkulatorin BTU për një vlerë orientuese.

Pse ka rëndësi diagnostikimi me matje

Rimbushja e gazit "sa për të provuar" është shpesh para e humbur: nëse rrjedhja nuk riparohet, gazi del sërish. Me manometra dhe termometra ustai sheh presionet, temperaturat dhe rrymën, dhe e gjen shkakun para se të ndërrojë ndonjë pjesë.